Zindagi Aaj Mein Hai, Hum Kal Aur Kal Mein Uljhay Hain

Pyaray dostu....

Aj subah chai ka cup haath mein tha aur dimagh apni hi kisi soch mein gum tha. Aik baat ka ehsaas baar baar hota hai ke hum insaan kitni ajeeb makhlooq hain. Aadha waqt mazi ko theek karne ki koshish mein guzar dete hain, jabke mazi aik band kitaab hoti hai. Kitna bhi soch lain, kitni bhi "agar magar" kar lain, us ka aik harf bhi tabdeel nahi hota.

Phir baqi aadha waqt mustaqbil ko apni marzi ke mutabiq likhne ki koshish mein laga dete hain. Hairat ki baat yeh hai ke mustaqbil ko aaj tak kisi ne dekha hi nahi, lekin hum us ke liye bhi poora naqsha bana kar baith jate hain. Jab zindagi hamari planning se mukhtalif mod leti hai to phir hum qismat se shikway karte hain. Shayad sukoon ka raaz sirf itna sa hai ke insaan "ab" mein jeena seekh le. Guzra hua waqt badal nahi sakta aur aane wala waqt hamare ikhtiyar mein nahi. Jo hamare paas hai, woh sirf yeh lamha hai... aur afsos hum isi ko sab se kam jeete hain.

Zindagi ke rang bhi ajeeb hain. Aksar hum woh rang oadh kar jeete hain jo humein pasand hi nahi hote. Kabhi majboori ke rang، kabhi zimmedari ke، kabhi logon ki umeedon ke. Aur jo rang dil chahta hai، woh ya to naseeb mein dair se aata hai ya phir aakar hawa ka rukh badalne ke saath hi phisal jata hai. Kabhi kabhi lagta hai hum mutthi mein titli ke rang sambhal rahe hain. Jitni mazbooti se pakarte hain، utni hi jaldi woh ungliyon se utar jate hain. Shayad zindagi humein yahi sikhati hai ke har khoobsurat cheez par qabza nahi kiya ja sakta. Kuch lamhay sirf mehsoos karne ke liye hote hain، hamesha ke liye apne banane ke liye nahi.

Ab sari duniya ki nazrein FIFA World Cup 2026 ke final par tik chuki hain. Spain vs Argentina... is se behtar final shayad mushkil hi hota. Aik taraf Spain ka possession football, discipline aur midfield ka kamaal hai. Doosri taraf Argentina ka jazba, creativity aur pressure mein nikal kar aane ki salahiyat. Tareekh bhi in dono ke muqablon ko kaafi dilchasp banati hai. Ab tak dono teams jab bhi aamne saamne aayi hain, Argentina ne zyada muqable jeete hain, jabke Spain ne bhi chand yaadgar fatahein hasil ki hain. Dono ka head-to-head Argentina ke haq mein halka sa jhukta hai, lekin final ka apna mizaj hota hai. Yahan purane record sirf kitaabon mein achhe lagte hain, ground par faisla us din ki performance karti hai.

Meri prediction? Dil ab bhi Argentina ke saath hai. Lekin agar Spain ne apni passing rhythm aur midfield control qaim rakha to woh kisi bhi team ko bebus kar sakti hai. Ek baat tay hai، football ke shoqeenon ke liye yeh final yaadgar hone wala hai. Aur halftime show mein BTS ki performance is event ko aur bhi yaadgar bana degi. Football aur music ka aisa sangam roz roz dekhne ko nahi milta.

Aj aik aur baat zehan mein aayi. Zindagi us din aasaan lagne lagti hai jab insaan yeh maan leta hai ke log... bas log hote hain. Woh aate hain، kuch dair saath chalte hain aur phir apni manzil ki taraf nikal jate hain. Na har koi intezar karta hai aur na kisi ke chale jane se duniya rukti hai. Parinday bhi sookhay darakht par zyada dair nahi rukte، woh naya aashiyana dhoond lete hain. Shayad insaan ko bhi logon se mohabbat karni chahiye، lekin apna sukoon un ke hawalay nahi karna chahiye.

Khair، bahar barsaat ka mausam hai aur mujhe hamesha se halki barish mein paidal chalna pasand raha hai. Kabhi kabhi milon tak chalne ka dil karta hai jab boonden aahista aahista kandhon par gir rahi hon. Us waqt kisi music player ki zarurat bhi mehsoos nahi hoti. Barish ki boondon ki awaaz apni hi aik moseeqi hoti hai، aur geeli mitti ki khushboo dil ke saath saath rooh ko bhi taaza kar deti hai. Shayad isi liye barsaat har saal nayi hoti hai، lekin us ka ehsaas kabhi purana nahi hota.

Rub Rakha