Muskuranay Ki Wajah Dhoondhiye... Bahaanay Nahi

Aj subah chai ka cup haath mein tha aur khayal aaya ke hum insaan bhi kamaal hain. Das khushiyan mil jayein to un par sirf aik muskurahat kharch karte hain, lekin aik gham mil jaye to us par poora din, kabhi kabhi poori zindagi qurban kar dete hain. Lagta hai gham ki marketing team, khushi se zyada mazboot hai.

Zindagi ka hisaab agar theek se dekha jaye to har din mein dono cheezen mojood hoti hain... khushi bhi aur udaasi bhi. Farq sirf itna hota hai ke nazar kis taraf zyada dair tikti hai. Aik hi shehar mein koi barsaat dekh kar chai bana raha hota hai aur koi wahi barsaat dekh kar shikayat likh raha hota hai. Mausam dono ke liye aik hi hota hai, bas soch ka darja mukhtalif hota hai.

Mujhe lagta hai khushi koi manzil nahi, aadat hai. Aur udaasi bhi aksar waqiat se kam, hamari soch se zyada paida hoti hai. Hum guzri hui baton ko baar baar replay karte rehte hain, jaise zindagi koi channel ho aur remote sirf rewind par he atka hua ho. Haqeeqat yeh hai ke jo lamha guzar gaya, us par afsos se zyada waqt kharch karna bhi aik qisam ka nuqsan hai.

Aur phir mohabbat ka qissa aa jata hai.

Aadmi aksar us din nahi tootta jab koi usay chhor kar jata hai. Woh to us se pehle hi daraaron se bhar chuka hota hai. Har mayoosi, har adhoora khwab aur har tootay aitbaar ne us mein chhoti chhoti daraarein daal di hoti hain. Phir aik din koi aata hai jo un daraaron mein roshni bhar deta hai. Achanak lagta hai duniya phir se rangeen ho gayi hai. Chand bhi wahi hota hai, suraj bhi wahi, raste bhi wahi... magar nazar badal jati hai.

Haan Lekin agar wohi shakhs kabhi chala jaye to hum samajhte hain ke us ne humein toda hai. Shayad nahi. Shayad hum pehle hi toot chuke thay. Us ne sirf kuch arsay ke liye humein yeh bhula diya tha.

Mohabbat ka sab se khoobsurat pehlu bhi yehi hai aur sab se mushkil pehlu bhi. Is liye kisi ko itna ikhtiyar mat dijiye ke us ke jane ke baad aap ko apni hi pehchan dhoondni pade.

Aur haan... zindagi mein har cheez ko itna serious bhi mat lijiye. Kabhi kabhi jis baat par hum neend khona shuru kar dete hain, chand mahine baad usi baat ko yaad karke khud hi hans rahe hote hain. Zindagi ka sense of humour hamare sense of humour se kaafi tez hota hai.

Aakhir mein bas itni si guzarish hai...

Un logon ki sohbat ko sambhal kar rakhiye jo aap ki qadar karte hain. Jo aap ke hone ko mamooli nahi samajhte. Jo aap ki kami mehsoos karte hain, aap ki izzat sirf saamne nahi, ghair mojoodgi mein bhi karte hain. Jo aap ke liye dil se dua karte hain, na ke sirf zarurat ke waqt yaad karte hain.

Aise log roz roz nahi milte. Duniya mein har cheez ka naumulbadal mil sakta hai... lekin ikhlaas jsei cheez ka nahi. Is liye jab koi dil se aap ka ho, usay sambhal kar rakhiye. Baqi zindagi ka kya hai... woh to har roz koi naya imtihan bhi deti hai aur koi nayi muskurahat bhi.