Lamhon Ka Hisaab Rakhiye... Umar Ka Nahi

Lamhon Ka Hisaab Rakhiye... Umar Ka Nahi

Aj subah chai ka cup haath mein tha to Rabindranath Tagore ka aik khayal yaad aa gaya.

"Titli mahinon ko nahi ginti, balkeh lamhon mein zinda rehti hai... is liye us ke paas bohat waqt hota hai."

Socha, baat to gehri hai. Hum insaan ulta hisaab rakhte hain. Calendar ke safhay badalte rehte hain, birthdays ginte rehte hain, saal jama karte rehte hain... lekin lamhe jeena bhool jate hain. Shayad isi liye umar barhti rehti hai aur zindagi kabhi kabhi chhoti lagne lagti hai. Titli ki zindagi hum se kitni kam hoti hai, magar woh har phool par poori zindagi jeeti hai. Hum poori zindagi guzar kar bhi aksar jeena shuru nahi karte.

Aik Punjabi she'r bhi yaad aa gaya.

"Galaan yaad ne sab zamane diyan...
Kinne khand keeti, kinne zehar keeti."

Waqai, insaan ajeeb makhlooq hai. Meethi baatein bhi yaad rakhta hai aur zehar gholne wale alfaaz bhi. Farq sirf itna hai ke mithaas kabhi kabhi waqt ke saath kam ho jati hai, lekin kadwahat saalon tak zuban par rehti hai. Is liye alfaaz bolne se pehle un ka wazan zaroor tol lena chahiye.

Aj agar Allah ne khana ata kiya hai, sehat bhi hai aur iman ki daulat bhi, to yaqeen maaniye hum duniya ke bohat se logon se zyada ameer hain. Insaan ki aadat hai jo nahi mila us ka hisaab rakhta hai, jo mil chuka us ka shukar kam karta hai.

Mujhe lagta hai har rishte ki bunyaad mohabbat nahi, ehtram hota hai. Mohabbat to kabhi kabhi jazbat ke saath kam zyada hoti rehti hai, lekin jab ehtram uth jaye to phir rishta sirf naam ka reh jata hai. Dosti ho, mohabbat ho ya khoon ka rishta... agar izzat na rahe to lafzon ka rishta reh jata hai, dil ka nahi.

Zindagi mein nakaami ki aik aur wajah bhi hum khud ban jate hain. Hum samajhte hain ke har shakhs humein dekh raha hai, hamare bare mein soch raha hai, hamare faislon ka hisaab rakh raha hai. Haqeeqat? Log apni hi uljhanon mein itne masroof hain ke unhein apni fikr se hi fursat nahi. Kabhi kabhi jis faislay se hum darte rehte hain, duniya us par do minute baat karke agle mauzu par chali jati hai.

Aur waqai... zindagi kabhi kabhi sirf na-mukammal khwabon ka naam lagti hai. Har insaan ke paas kuch aise khwab hote hain jo bas khwab hi reh jate hain. Lekin shayad yahi adhoorapan humein agla qadam uthane par majboor karta hai.

Kisi ne khoob kaha tha ke qeemti pathar zameen ki satah par nahi milte, un ke liye khudai karni padti hai. Mujhe lagta hai rishte bhi bilkul aise hi hote hain. Aaj kal log do din ki guftagu mein umar bhar ki wafa dhoondte hain. Haqeeqi rishte waqt, bardasht aur bharose ki mitti khod kar nikalte hain. Jaldi milne wali cheezen aksar jaldi kho bhi jati hain.

Aj aik aur baat ne dil ko chhoo li. Kuch alfaaz gale tak aakar wapas laut jate hain. Kuch baatein hum sari umr kisi se keh hi nahi pate. Phir wohi baatein dheere dheere andar hi andar insaan ko kha jati hain. Shabbir Hasan ne kya khoob kaha:

"Aawazon ke khaali pan ko khamoshi se bhar jate hain...
Adhi baat chhupane wale adhi umr mein mar jate hain."

Har baat keh dena zaroori nahi hota, lekin har baat daba lena bhi sehatmand aadat nahi.

Aur chaliye, zara bazaar ka chakkar bhi laga lete hain. Tamatar ki qeemat dekh kar lagta hai ke ab salan se pehle budget meeting karni padegi. 360 rupay kilo! Do tamatar lo aur sau rupay nikal do. Aise halaat mein lagta hai tamatar nahi, kisi jeweller ki dukaan se cheez khareed rahe hain. Filhal to dahi bhi salan ka dost ban gaya hai. Waise soch raha hoon... agar tamatar isi raftaar se mehnga hota raha to kal ko mehmaan se poochna padega, "Salan tamatar wala khayenge ya sirf tasveer dekh kar guzara karenge?"

Khair... zindagi isi tarah chalti rehti hai. Kabhi meethi, kabhi kadwi, kabhi sasti aur kabhi tamatar ki tarah mehngi.

Aur aaj ki guftagu ko in alfaaz par khatam karta hoon:

«"Muqaddar ki zanjeeron se bandhe hum siyah bakht log...
Umrein guzar dete hain mojzon ke intezar mein."»

Shayad mojza kisi din achanak nahi hota. Shayad mojza us din shuru hota hai jab insaan intezar chhor kar chalna shuru kar deta hai, shukar ada karta hai aur umeed ka diya bujhne nahi deta.