Kuch Kahaniyan Bas Mehsoos Hoti Hain

Aj subah chai ka cup haath mein tha aur khayalat apni marzi se idhar udhar bhatak rahe thay. Aik baat ne bohat dair tak saath nahi chhora.

Insaan hamesha jism se nahi marta.

Kabhi kabhi us ke andar rehta hua woh masoom sa shakhs chup chaap kahin kho jata hai. Woh jo har baat par muskurata tha, logon par jaldi aitbaar kar leta tha, chhoti chhoti khushiyon mein apni duniya dhoond leta tha. Phir aik din woh nazar hi nahi aata. Jism wahi rehta hai, naam bhi wahi rehta hai, roz ka routine bhi nahi badalta... bas andar ka insaan pehle jaisa nahi rehta. Shayad isi liye kuch log zinda hote huay bhi bohat khamosh lagte hain.

Zindagi ka aik aur usool bhi ajeeb hai. Har kahani ka woh khoobsurat "The End" nahi hota jis ki hum umeed karte hain. Kuch kahaniyan kisi maafi, kisi wapsi ya kisi wazahat par khatam nahi hotin. Woh sirf acceptance tak pohanchti hain. Aik din insaan yeh maan leta hai ke jo hona tha, ho chuka. Jo chala gaya, usay rokna mere bas mein nahi tha. Aur hairat ki baat yeh hai ke kabhi kabhi yeh acceptance woh sukoon de deta hai jo hazaar maafiyan bhi nahi de paatin. Har zakhm ka ilaaj jawab nahi hota, kuch zakhm waqt aur tasleem se hi bharte hain.

Aj social media par aik khabar bhi dekhi jis ne dil udaas kar diya. Aik siyasi mukhalif soch rakhne wale shakhs ne sirf pandrah saal ki bachi ko rape ki dhamki di. Soch kar hi afsos hota hai ke ikhtilaf-e-raaye ka jawab bhi kuch log tashaddud aur khauf se dena chahte hain. Kisi bhi bachay ya aurat ko dhamkana ya us ke khilaf jinsi tashaddud ki dhamki dena sirf ghatiya rawayya nahi, balkeh insaniyat ki shikast hai. Jab muashray mein mujrim ko apne anjaam ka darr kam mehsoos hone lage to us ki himmat barh jati hai. Humein aise rawaiyon ki wazeh muzammat karni chahiye aur har bachay aur har aurat ke liye mehfooz muashra banana chahiye.

Chaliye, itni sanjeedgi ke baad zara muskura bhi lete hain.

Aik bhai sahib kai saalon se dua kar rahe thay:

"Ya Allah! Mujhe aulaad-e-nareena ata farma."

Kai saal guzar gaye. Dua bhi jari rahi aur aulaad bhi na hui.

Aakhir aik farishta nazil hua, un ki gardan par halka sa thapki de kar bola:

"Anni dya... pehlay viah te kar lai!"

Bas, kuch masail ka hal dua se pehle planning mein bhi hota hai.

Aur aakhir mein dil un tamam walidain ke liye izzat se bhar jata hai jo is daur mein apne bachon ko behtar zindagi dene ki koshish kar rahe hain. Mehngai, zehni dabao, social media ka asar, waqt ki kami aur kamzor hota hua khandani nizam... yeh sab mil kar har din ko aik naya imtihan bana dete hain. Phir bhi maa baap har subah uth kar dobara koshish karte hain ke un ke bachon ki muskurahat qaim rahe. Shayad hamare daur ki sab se bari bahaduri talwar uthana nahi, balkay har mushkil ke bawajood apne bachon ke liye umeed ka diya roshan rakhna hai. Har walidain ki khwahish bas itni si hoti hai ke un ke bachon ka bachpan sukoon, muhabbat aur khushiyon ke saaye mein guzre... aur agar yeh khwahish poori ho jaye, to shayad duniya ki sab se bari kamyabi bhi wahi hai.