Itwar Ki Shaam... Chai, Sabr Aur Kuch Adhoori Guftagu

Kia haal dosto? Itwar ka din bhi palak jhapakte hi guzar gaya. Hamari to yeh ikloti chhutti aise nikal jati hai jaise kisi ne ghari ki sui ko tez kar diya ho. Subah ka nashta, ghar ke kuch kaam, thodi si aaram ki koshish aur dekhte hi dekhte shaam darwaze par dastak dene lagti hai. Kabhi kabhi to lagta hai hum mein aur kolhu ke bail mein bas itna hi farq hai ke woh aankhon par patti baandh kar chalta hai aur hum khuli aankhon ke saath. Baharhaal, zindagi ki gaari chalani bhi hai. Akeli jaan aur hazaar jhamele... phir bhi muskura kar agla din shuru karna padta hai.

Aaj aik misra yaad aa gaya.

"Wafa ke tazkare bas reh gaye kitabon mein... sitam to yeh hai ke kitabon ka daur bhi na raha."

Sach poochiye to aaj kal har cheez tez ho gayi hai, bas rishte dheere dheere kamzor hote ja rahe hain. Wafa, ikhlaas aur qadr ke lafz ab bhi zinda hain, magar unhein jeene wale log kam nazar aate hain. Shayad isi liye purani kitaben aur purane log aaj bhi dil ke qareeb lagte hain.

Zindagi ne aik aur sabaq bhi diya hai. Apni chai sukoon se piya kijiye. Apni pasand ke kapde pehniye. Haan Har behas mein jeetna zaroori nahi hota hay. Agar koi kahe ke "Kawa safed hai," to muskurakar keh dijiye, "Ji bilkul, aur aaj subah usay udte bhi dekha tha." Har baat ki wazahat dena bhi thakan ka sabab ban jata hai. Aap insaan hain, jhaaru nahi ke har jagah safai dete phirein. Har kisi ko razi rakhna mumkin nahi, is liye apne dil ki bhi suniye.

Doosron ki raye ka ehtram zaroor kijiye, magar faisla wohi kijiye jo zameer ko mutmain kare.

Mujhe lagta hai insaan ko agar aik hunar zaroor seekhna chahiye to woh hai khud ko hausla dena. Har mushkil mein yeh zaroori nahi ke koi kandhe par haath rakh kar tasalli de. Kabhi kabhi apne hi kandhe par haath rakh kar kehna padta hai...

"Himmat rakho... sab theek ho jayega."

Aur phir nazar upar uthani chahiye, kyun ke jis ka sahara Allah ho, us ki umeed kabhi tanha nahi hoti.

Hasad bhi ajeeb marz hai. Agar aap ke paas salahiyat hai to phir kisi se jalne ki kya zarurat? Aur agar har waqt doosron ki kamyabi dekh kar dil tang hota rahe to samajh lijiye ke masla doosron ki taraqqi nahi, apni soch hai. Salahiyat mehnat se barhti hai aur hasad insaan ko andar hi andar kha jata hai. Doosron ki roshni bujha dene se apna diya kabhi roshan nahi hota.

Khair, zindagi isi tarah seekh deti rehti hai. Kabhi Itwar ki chhoti si chhutti ke zariye aur kabhi aik cup chai ke saath baith kar.

Aur aaj ki guftagu ka ikhtitam Amjad Islam Amjad ke in haseen alfaaz par karta hoon.

"Is se pehle ke yeh sawan ki jhari tham jaye,
Jitne iqraar ke alfaaz hain keh do mujh se.
Bheegte pair hain, main hoon, tum ho...
Is baraste huay baadal ki tarah,
Lafz agar mud kar na aaye bhi to kya...
Bheegte pair kise ja kar gawahi denge."

— Amjad Islam Amjad

Kabhi kabhi kuch ehsaas keh dene chahiye. Kyun ke waqt guzar jata hai, barsaat tham jati hai aur phir bheegte darakht bhi khamosh ho jate hain. Us ke baad gawahi dene ke liye sirf yaadein reh jati hain.